Ukraynaya yardım etdiyi deyilən zabitlər | Rusiya FTX hərəkətə keçdi
Rusiyanın Federal Təhlükəsizlik Xidməti 59 mülki təyyarə və helikopterin ölkədən qeyri-qanuni çıxarılması ilə bağlı cinayət işləri üzrə Federal Hava Nəqliyyatı Agentliyində axtarışlar aparıb.
Bu barədə yerli media məlumat yayıb. Xəbərə görə, axtarışlar nəticəsində sözügedən Agentliyin bir neçə əməkdaşına qarşı səhlənkarlıq və vəzifə səlahiyyətlərindən sui-istifadə ilə bağlı cinayət işləri açılıb.
Təqsirləndirilən şəxslər 59 təyyarə və helikopteri qanunsuz olaraq Rusiya yurisdiksiyasından çıxarmaqda şübhəli bilinirlər. Onların bəziləri dost olmayan ölkələrə gedib və hətta Ukraynaya hərbi yardım göstərmək üçün istifadə olunub.
Yerli medianın məlumatına görə, Federal Təhlükəsizlik Xidməti və Daxili İşlər Nazirliyinin əməkdaşları ittiham olunan iki zabitin ofisindən müvafiq sənədləri taparaq müsadirə edib.
Uçuşların Təhlükəsizliyi Təftişi İdarəsinin rəisi Kristina Buvalina və Mülki Aviasiyaların Dövlət Qeydiyyatı, Hüquqları və onlarla Münasibətlər Departamentinin rəis müavini Petr Kozırev ofislərindən tapılan sənədlərə görə artıq hüquq mühafizə orqanları tərəfindən saxlanılıblar.
Məlumat üçün bildirək ki, Federal Hava Nəqliyyatı Agentliyinin keçmiş rəhbəri Aleksandr Neradko da sözügedən hadisədə ən çox adı hallananlar sırasındadır.