Venesuela neft hasilatını və ixracını azaldıb

ABŞ-nin tətbiq etdiyi blokada ilə əlaqədar olaraq Venesuela neft hasilatını və ixracını sutkada 0,6 milyon barel azaldıb.

Bu barədə ABŞ Energetika Nazirliyinin Enerji İnformasiyası İdarəsinin hesabatında bildirilir.

Nazirliyin məlumatına görə, ABŞ sanksiyaları çərçivəsində tətbiq edilən neft blokadası və Venesuelaya məxsus sanksiyaya məruz qalan neft tankerlərinin Latın Amerikası ölkəsi yaxınlığında ələ keçirilməsi ölkənin neft ixracının böyük hissəsinin dayanmasına, bunun nəticəsində isə hasilatın da dayandırılmasına səbəb olub.

Qeyd edək ki, 7 yanvar tarixində ABŞ Energetika Nazirliyi bəyan edib ki, Birləşmiş Ştatlar artıq Venesuela neftinin dünya bazarlarında satışına başlayıb. Nazirlik vurğulayıb ki, neft satışından əldə olunan vəsaitlər Birləşmiş Ştatların nəzarətində olan bank hesablarına köçürüləcək. Daha sonra bu vəsaitlər Vaşinqtonun qərarına əsasən ABŞ və Venesuela xalqlarının maraqları naminə bölüşdürüləcək.