Xameneinin ölümü İran daxilində xaosa səbəb ola bilər?

İranın ali dini rəhbəri Əli Xameneinin ölümündən sonra onun varisi məsələsində hakimiyyət daxilində yaranacaq gərginlikdən sonra ABŞ və İsrail incəliklə fürsətdən istifadə edib rejimi dəyişə bilər.

Bu barədə “The Jerusalem Post” qəzeti yazıb.

İsrail nəşri bildirib ki, Xameneinin öldürülməsi, həbsi və ya aradan götürülməsi hakimiyyətin devrilməsinə zəmin yaratmayacaq: “Hətta bu, İran daxilində reaksiyalara görə işi daha da çətinləşdirə bilər. Amma Xamenei təbii ölümə yaxın yolla ölərsə, təbii xaos və rəqib qruplar arasında rəqabət öz-özünə yarana bilər.

İnternetə nəzarət və siyasi-iqtisadi sahədə SEPAH-ın dərin təsirini nəzərə alsaq, ən azı bir yüksək səviyyəli İran hərbi komandiri olmadan bu rejimi devirmək çox çətin olacaq.

“The Jerusalem Post” qeyd edib ki, Naftali Bennettin baş nazirliyi dövründə İsrail İranda onlarla sahəni əhatə edən effektli əməliyyatlar keçirib: “Məqsəd İran hakimiyyətini zəiflətmək üçün ABŞ-nin uzunmüddətli taktikasına bənzər üsullardan istifadə etmək olub”.

Nəşrin fikrincə, təkcə Xamenei yox, SEPAH və onun bütün komponentləri zəiflədilməli, əvəzində İran daxilindən daha təbii yerli qüvvələr önə çıxarılmalıdır ki, hakimiyyətin devrilməsi mümkün olsun.