Yeni yardım Ukraynaya nə qazandıracaq?
ABŞ-nin ayırdığı və ölkə Senatının təsdiqlədiyi 60 milyard dollardan çox hərbi yardım paketi Rusiya-Ukrayna müharibəsinin gedişatı ilə bağlı Kiyev Administrasiyasında böyük ümidlər yaradıb.
Yardımın dərhal çatacağı təqdirdə ciddi çətinliklərlə üzləşən Ukrayna Ordusunun yeni həmlələr edəcəyi gözlənilir. Lakin bu yardımın itirilən ərazilərə nəzarətin bərpasına deyil, daha çox müdafiəyə sərf ediləcəyi deyilir.
Ukrayna Ali Radasının komitə sədri Fyodor Venislavski bildirib ki, ABŞ-nin qərarı Ukrayna üçün həyati əhəmiyyət kəsb edir:
“Bu yardım ilk növbədə silah bərabərsizliyini aradan qaldıracaq. Bizdə ciddi mərmi çatışmazlığı var. Biz əvvəlcə döyüş sursatı və yeni silah növləri, raketlər alacağıq. Onlar bu gün bizə hücumların qarşısını almaq üçün vacibdir. Bizim üçün ABŞ-nin və Avropa İttifaqının köməyi vacibdir. Yeni yardım ordumuzu silahlandırmaq məqsədi daşıyır”.
Qeyd edək ki, son bir neçə gündə Ukraynanın Donetsk, Xarkov, Xerson, Zaporojye vilayətləri ilə yanaşı, sərhədyanı Çerniqov, Sumı, o cümlədən Kiyev vilayətlərinə hava hücumları artıb. Donetsk vilayətinin bir neçə kəndində Ukrayna Ordusunun geri çəkildiyi bildirilir.