Zaporojye və Xarkov hücuma məruz qaldı

Rusiya İkinci Dünya müharibəsində Qələbənin qeyd olunması şərəfinə Ukrayna ilə 8 və 9 may tarixlərində atəşkəs elan edir.

Bu barədə ölkənin Müdafiə Nazirliyindən məlumat verilib.

"Rusiya Federasiyası Silahlı Qüvvələrinin Ali Baş Komandanı Vladimir Putinin qərarına əsasən, Böyük Vətən müharibəsindəki Qələbənin qeyd edilməsi şərəfinə 8 və 9 may tarixlərində atəşkəs elan edilir", – deyə bəyanatda qeyd olunub.

Həmçinin bildirilib ki, Moskva atəşkəsin elan edilməsi ilə əlaqədar Kiyevin ondan nümunə götürəcəyini gözləyir.

Bu arada, Ukrayna Daxili İşlər Nazirliyinin məlumatına görə Rusiya hərbçiləri mayın 4-də Ukraynanın yeddi regionunu atəşə tutub. Nəticədə 14 nəfər ölüb, 60-a yaxın insan yaralanıb. Bildirilir ki, ən çox Xarkov vilayətindəki Merefa şəhəri zərər görüb.

Bundan əlavə, Zaporojyedəki məbədin ərazisinə də zərbə endirilib. Nəticədə Zaporojyedə 2, Xarkovda isə 7 nəfər həlak olub. Eyni zamanda, Rusiya Silahlı Qüvvələri enerji infrastrukturlarına hücumlarını davam etdirir.