Zelenski "Qələbə planı"nın ilk bəndini yerinə yetirə bilmir? | Heç bir ölkə Ukraynaya...

Ukrayna Prezidenti Volodimir Zelenski bu ilin oktyabr ayında açıqladığı “Qələbə və sülh planı”nda ölkəsinin NATO-ya üzvlüyünün ilk şərt olduğunu bildirsə də, son günlər verilən açıqlamalar bunun qeyri-real olduğunu göstərir.

Belə ki, istər Qərb, istərsə də yerli mətbuat Ukraynanın NATO-ya üzv qəbul edilməsinin ən azı hazırda real görünmədiyini bildirir.

Xüsusilə Şimal Alyansının bir sıra üzvlərinin Ukrayna əleyhinə mövqeləri bu fikri daha da möhkəmləndirir.

Belə olduğu halda Ukrayna Prezidentinin elan etdiyi “Qələbə və sülh planı”nın da reallığının şübhə altına düşməsi müzakirələrə səbəb olur.

Ukrayna Prezident Ofisinin müşaviri Mixaylo Podolyak bildirib ki, müharibədən sonrakı quruluş, burada Ukraynanın səlahiyyətləri müəyyən təhlükəsizlik funksiyalarını yerinə yetirmək baxımından NATO daxilində kontingent yaratmaqla həyata keçirilə bilər:

“Prezident təklif edib ki, Ukraynanı NATO-ya dəvət etmək “Qələbə planı”nın ilk bəndidir. Ukraynanın hərbi imkanlarını artırmaq ikinci və üçüncü bəndlərdir. Bura Ukraynanın müəyyən alətlərlə təchiz edilməsi daxildir. Rusiya üçün iqtisadi məhdudiyyətlər dördüncü bənddir.

Rusiya tez-tez NATO, üzvlük, qeyri-üzvlük məsələsini əsas element kimi istifadə edir. Söhbət məhz NATO-ya dəvət faktından gedir. Avropadakı hər hansı bir ölkənin istənilən alyansa qoşulmaq və ya qoşulmamaqla bağlı suveren hüququnu həyata keçirə biləcəyini bildiririk. Bu hüquq tamamilə suveren olmalıdır.

Bilirik ki, Ukrayna ilə bağlı NATO Alyansının iki vacib tərəfdaşında – ABŞ və Almaniyada müəyyən şübhələr var. Lakin onlarla işləmək lazımdır və düşünürəm ki, ABŞ-nin mövqeyi artıq başqa cür görünür. ABŞ-yə təzyiqi davam etdirmək lazımdır. Almaniyanın mövqeyi ABŞ-nin mövqeyindən asılı olacaq. Buna görə də, prinsip etibarilə bu, vacib müzakirədir”.

Qeyd edək ki, hazırda Qərbin natamam dəstəyi fonunda Ukrayna cəbhədə geriliyə məruz qalır.