11 yaşlı Rüzgarın faciəvi sonu | Oğlunun ölümünə dözməyən ana fəryad etdi

Şəkidə 11 yaşlı uşaq rayon xəstəxanasında ölüb. Hadisə rayonun Cumakənd kəndində baş verib.

Kənd sakini, 11 yaşlı Rüzgar Ağabalayev halı pisləşdiyi üçün yaxınları tərəfindən Şəki Rayon Mərkəzi Xəstəxanasına yerləşdirilib və orada ürək çatışmazlığından həyatını itirib.

“Hər gün xəstəxanaya aparıb-gətirirdik. Həkim deyirdi ki, dəqiq diaqnozunu bilmədən uşağa əl vura bilmərəm. Övladımın stolda canı çıxdı. Evdə təhsil alırdı, arzuları yarımçıq qaldı”, – dünyasını dəyişən uşağın anası deyib.

Hadisə ilə bağlı TƏBİB-dən bildirilib ki, 2014-cü il təvəllüdlü şəxsə kəskin ürək çatışmazlığı və qarın boşluğunda mayenin yığılması diaqnozu təyin olunub. Göstərilən zəruri tibbi yardımlara və həkimlərin çoxsaylı müdaxilələrinə baxmayaraq, ölüm faktı qeydə alınıb.

Xatırladaq ki, Ağabalayevlər ailəsinin bundan əvvəl 2 və 3 yaşlı iki qız övladı da xəstəlikdən ölüb.