3 uşaq və 2 qadının olduğu evdə faciə: “Qonşulara dedim, kömək edin, təpiklə vurdum ki..." - Baku TV

29 dekabr 2025 30 baxış

Binəqədi rayonunda ölümlə nəticələnən yanğın hadisəsi baş verib.

Hadisə rayonun Səttar Bəhlulzadə küçəsində yerləşən fərdi yaşayış evlərindən birində qeydə alınıb.

Məlumata görə, yanğın baş verən zaman evdə iki qadın və üç uşaq olub.

Yanğın nəticəsində ev sahibinin baldızı, 35 yaşlı qadın ağır yanıq xəsarətləri alıb və hadisə yerində həyatını itirib.

Ev sahibi hadisə ilə bağlı bunları bildirib:

“Pəncərəni açıb qonşuları köməyə çağırdım. İki-üç dəfə dəmir barmaqlığa təpik vurdum, amma sınmadı. Qonşular sağ olsunlar, kömək etdilər, barmaqlığı sındırdılar. Mən tullananda yıxıldım. Qışqırdım ki, qız külə dönür, onu çıxarın. Çıxaranda bədəni yanmışdı, amma hələ nəfəs alırdı. Təcili tibbi yardım çağırdım, lakin onlar gələnədək baldızım dünyasını dəyişdi”.

“Qadını dörd kişi böyük çətinliklə çıxardı. Təcili reanimasiya tədbirləri görüldü, amma o an can verdi”, – qonşulardan biri deyib.

#Binəqədi