Ad günü dəhşətli qətllə bitdi | Bakıdakı cinayətin bütün detalları

“2023-cü il martın 9-da 1996-cı il təvəllüdlü Elbrus Orucov bıçaqlanaraq qətlə yetirilib. Hadisə Müşfiqabad qəsəbəsində, 7-ci və 10-cu binaların arasındakı yolda baş verib.

Martın 10-da Ağdam rayon sakini Mehman Məmmədov könüllü polisə gələrək, təslim olub. Qaradağ Rayon Prokurorluğunda Cinayət Məcəlləsinin qəsdən adam öldürmə maddəsi ilə cinayət işi başlanılıb.

Məhkəmə-tibbi ekspertizasının rəyinə görə, Elbrus Orucovun ölümünə ürəyinin zədələnməsi nəticəsində baş vermiş daxili qanaxma səbəb olub.

İstintaqla müəyyən edilib ki, martın 9-da Müşfiqabad qəsəbəsindəki kafedə keçirilən ad günü məclisi qurtarandan sonra Mehman Məmmədov tanışları – Elbrus Orucov, Nicat Baxışov, Samir İbişov və Sadiq Cavadovla birlikdə oradan çıxıb, yaşadıqları binaların qarşısına gəliblər. Hamı avtomobilindən çıxsa da, Elbrus Orucov düşməyərək, ona sözü olduğunu bildirib. Elbrus Mehmana 2 gün əvvəl ortaq tanışlarının narkotik vasitə istifadə edib-etməmələri ilə bağlı polis əməkdaşları tərəfindən sahə məntəqəsinə aparılıb, sorğu-sual edildiklərini və onun adının qəsəbədə “polislərin xəbərçisi” kimi hallandırıldığını deyib. Mehman Elbrusun sözlərinə etirazını bildirərək buna aydınlıq gətirməsini tələb edib. Avtomobildən düşüb mübahisələrini davam etdirərkən Mehman Məmmədov, Elbrus Orucovun çiyin, boyun və sinə nahiyyələrinə çoxsaylı bıçaq zərbələri vuraraq onu öldürüb.

Məhkəmə iclasında Mehman Məmmədov ittiham üzrə özünü qismən təqsirli bilib.

Bakı Ağır Cinayətlər Məhkəməsinin hökmü ilə Mehman Məmmədov 10 il 6 ay müddətinə azadlıqdan məhrum olunub.