Astarada evlərə yaxınlaşan təhlükə: yoxa çıxan torpaqlar

Bir neçə müddətdir ki, Astaranın Şahağac kəndində intensivləşən torpaq sürüşməsi 50-yə yaxın ev üçün təhlükəli vəziyyət yaradıb. Ərazidən keçən Pensərçay sağ və sol sahillərinə doğru genişlənərək torpaq qatını yuyub və evlərə doğru istiqamət alıb.

Sakinlər narahatdırlar ki, əgər çay kənarına bənd vurulmasa, növbəti seldə daha böyük fəsadlar yarana bilər və yaşadıqları evləri tərk etmək məcburiyyətində qalacaqlar.

Məsələ ilə bağlı Şahağacı kənd bələdiyyəsinin sədri Samir Mayilov bildirib ki, baş verən təbii fəlakətlə bağlı dərhal rayon icra hakimiyyətində komissiya yaradılıb:

“Yaradılan komissiya ilə birgə həmin yerlərə baxış keçirilib. Fövqəladə Hallar Nazirliyinin və Azərbaycan Dövlət Su Ehtiyatları Agentliyinin müvafiq qurumlarına məlumat verilib. Onların əməkdaşları həmin ərazilərə baxış keçirib və aktlaşdırılıb. Məsələ ilə bağlı tədbirlərin görüləcəyi bildirilib”.