Bakıda keçmiş məcburi köçkündən arvadına qarşı ağlasığmaz əməl

Bakıda yaşayan keçmiş məcburi köçkün çörəkpulu kartına görə arvadını döyüb.

Oxu.az-ın məlumatına görə, hadisə paytaxtın Sabunçu rayonunda baş verib.

Rayon ərazisində yaşayan, əslən Xocalı şəhərindən olan 1985-ci il təvəllüdlü Şahmurad Məmmədov (ad və soyad şərtidir) həyat yoldaşından ayrılıb, ikinci dəfə ailə qurub. Onların birgə nikahdan iki övladları olub. Şahmurad və yeni həyat yoldaşına keçmiş məcburi köçkün kimi aylıq 60 manat çörəkpulu verilsə də, qadın çörəkpulu kartını öz anasına verib.

Şahmurad bu barədə dəfələrlə həyat yoldaşına irad bildirsə də, o, kartı anasından geri almayıb.

Bir neçə gün əvvəl Şahmuradın övladı xəstələnib və ona pul lazım olub. O, bu məqsədlə həyat yoldaşından xahiş edib ki, çörəkpulu kartını anasından alıb ona versin. Qadın isə bu hadisədən əsəbiləşərək Şahmuradı təhqir edib. Nəticədə evdə dava düşüb və Şahmurad həyat yoldaşını döyüb.

Hadisə yerinə polis əməkdaşları gəliblər, Şahmurad saxlanılıb. Faktla bağlı cinayət işi başlanılıb və iş məhkəməyə göndərilib.

Sabunçu Rayon Məhkəməsində keçirilən prosesdə ər-arvad barışıblar. Məhkəmə barışığı nəzərə alaraq Şahmurad Məmmədovu məsuliyyətdən azad edib.