“Biz gələndə meyit qanın içində idi” | Salyanda 4 uşaq atası güllələndi - Baku TV

Salyan rayonunun Qardili kəndində güllələnmə hadisəsi baş verib.

46 yaşlı Famil Lətifov bacısının həyat yoldaşı, 60 yaşlı Natiq Sadıqov tərəfindən tüfəngdən açılan atəş nəticəsində həyatını itirib.

Yaxınlarının sözlərinə görə, hadisə gecə saatlarında baş verib. İddia olunur ki, şübhəli şəxs içkili vəziyyətdə avtomobillə Famil Lətifovun yaşadığı evin qarşısına gələrək siqnal verib. Səsə oyanan Famil Lətifov çölə çıxan kimi ona atəş açılıb.

Mərhumun anası bildirib ki, oğlunun həyatını xilas etmək mümkün olmayıb: “Elə evdən çıxan kimi vurdu. Mən elə bildim sağ qalar. Köməyə çağırdıq, amma gəlib baxanda artıq dünyasını dəyişmişdi”.

Hüquq-mühafizə orqanlarının əməkdaşları tərəfindən keçirilən operativ əməliyyat-axtarış tədbirləri nəticəsində cinayəti törətməkdə şübhəli bilinən Natiq Sadıqov saxlanılaraq istintaqa təhvil verilib.

Faktla bağlı Salyan Rayon Prokurorluğunda araşdırma aparılır.