"Deməli, istədiyi sürətlə sürə bilər" | Bu yol niyə sakinlərin kabusuna çevrilib? - Baku TV

Salyanın Yolüstü kəndindən keçən Salyan–Şirvan avtomobil yolunun vəziyyəti sakinlərin ciddi narahatlığına səbəb olub.

Kənd sakinləri bildirirlər ki, yolda dəfələrlə ölümlə nəticələnən yol-nəqliyyat hadisələri baş verib. Yaranan problemlə bağlı sakinlər Baku TV-nin qaynar xəttinə müraciət ediblər.

“Maşınların yüksək sürətlə hərəkət etməsi, məhdudlaşdırıcı yol nişanlarının və işıqforların olmaması, ölümlə nəticələnən yol-nəqliyyat hadisələri bizi narahat edir. Sağda və ya solda bir-iki maşın dayananda gələn avtomobilləri görmək üçün az qala yolun yarısına qədər çıxmalı olursan. Magistral yola çıxmaq mümkün deyil. Son bir ayda üç-dörd ölüm hadisəsi baş verib”, – sakinlərdən biri bildirib.

Başqa bir sakin isə yoldakı nişanlanma xətlərindən narazılığını ifadə edib:

“Düz xətt çəkilməyib, qırıq-qırıq xətt çəkilib. Bu isə sürücülərin istədikləri sürətlə hərəkət etməsinə şərait yaradır. Bu yolda beş ölüm hadisəsi baş verib. Xətlər çəkiləndən bir gün sonra bir gənc oğlan burada baş verən qəza nəticəsində həyatını itirdi”.