Büdcəni talayan sabiq baş həkim və köməkçisinə hansı cəza verildi?

“Masallı Rayon Mərkəzi Xəstəxanası” publik hüquqi şəxsin sabiq direktoru Cəlil Nəzərov və köməkçisi Təranə Əliyevanın cinayət işi üzrə məhkəmə prosesi yekunlaşıb.

Lənkəran Ağır Cinayətlər Məhkəməsində keçirilən sonuncu prosesdə Cəlil Nəzərova 9 il 6 ay müddətinə cəza təyin olunsa da, onunla bağlı Cinayət Məcəlləsinin 70-ci maddəsi tətbiq olunaraq yekun 3 il sınaq müddəti ilə şərti cəza təyin olunub. Onunla birgə ittiham edilən köməkçisi Təranə Əliyeva barəsində isə 4 il müddətinə azadlığı məhdudlaşdırılmaqla elektron qolbaq tətbiq edilib.

Qeyd edək ki, xəstəliyi ilə bağlı azadlığa buraxılan Cəlil Nəzərov Lənkəran Ağır Cinayətlər Məhkəməsinə təcili yardım avtomobilində xərəkdə gətirilib. 2023-cü ilin əvvəlində “Masallı Rayon Mərkəzi Xəstəxanası” publik hüquqi şəxsin sabiq direktoru olan Cəlil Nəzərovun məhkəmə istintaqı səhhətinin pisləşməsi ilə bağlı dayandırılıb.

Prokuror təqsirləndirilən Cəlil Nəzərovun 12 il 6 ay, Təranə Əliyevanın isə 9 il azadlıqdan məhrum edilməsini məhkəməyə təklif etmişdi.

İttihama görə, Cəlil Nəzərovun qeyd olunan vəzifədə işləyərkən tabeliyində olan şəxslə qabaqcadan əlbir olaraq 2007-2020-ci illər ərzində xəstələrə əlillik dərəcəsinin təyin olunması müqabilində ümumilikdə 321 nəfərdən 400 min manat pul vəsaitini təkrarən rüşvət qismində almasına və rəhbərlik etdiyi tibb müəssisəsinin maddi-texniki təminatı üçün dövlət büdcəsindən ayrılmış 275 min manatı mənimsəməsinə əsaslı şübhələr müəyyən edilib.

Sabiq baş həkimin köməkçisi Təranə Əliyeva isə ümumilikdə 34 nəfərdən 52 min manat rüşvət almaqda təqsirləndirilir. Hər iki şəxs barəsində Cinayət Məcəlləsinin müvafiq maddələri ilə cinayət işi açılaraq barələrində həbs qətimkan tədbiri görülüb.

İbtidai istintaq zamanı vurulmuş ziyanın təmin edilməsi məqsədilə Cəlil Nəzərova məxsus Masallı rayonu ərazisində yerləşən daşınmaz əmlaklar üzərinə həbs qoyulub. Qərara görə, zərərçəkənlərə dəymiş ziyan isə ona tətbiq edilmiş şərti cəza müddətində tam ödənilməlidir.