Digərlərinə dərs olsun | Həbsxana rəisi insidentlə bağlı məhkəmədə ifadə verdi

Cəzaçəkmə müəssisəsində öz məhkum yoldaşını öldürməyə cəhddə təqsirləndirilən Azər Şalıyevin növbəti məhkəmə prosesi keçirilib.

Bakı Ağır Cinayətlər Məhkəməsinin hakimi Faiq Qəniyevin sədrliyi ilə baş tutan prosesdə hadisənin qeydə alındığı 12 saylı cəzaçəkmə müəssisəsinin rəisi Babək İskəndərov ifadə verib.

O, hadisə baş verən zaman həmin müəssisədə əməliyyat və rejim işləri üzrə rəis müavini vəzifəsində çalışdığını vurğulayaraq, təqsirləndirilən Azər Şalıyevi ümumilikdə müsbət xarakterizə etsə də, tərətdiyi cinayət əməlinin digər məhkumlara da pis örnək olduğunu deyib. O buna görə də məhkəmədən ona layiqli cəzanın verilməsini xahiş edib.

Həbsxana rəisi baş verən hadisənin zərərçəkən məhkum Şəhriyar Baxşəliyevin məhkum yoldaşı Azər Şalıyevə məxsus telefon kitabçasına gizlin baxması səbəbindən olduğunu deyib. “Onun bu hərəkəti isə məhkumlar arasında düzgün qəbullanmadığından Azər Şalıyev öldürmək yox, sadəcə, cəzalandırmaq məqsədilə ona xəsarət yetirib” deyərək Babək İskəndərov vurğulayıb.