Əlindən tutdum ki, çıxarım, qabağımı kəsdilər... | “OBA” marketdə kimi girov götürüblər?

Paytaxtın Sabunçu rayonunda “OBA” marketlər şəbəkəsinin filiallarının birində 9-cu sinif şagirdi oğurluq etdiyi üçün mağaza müdiri tərəfindən girov götürülüb.

Valideyn iddia edir ki, dəymiş ziyan ödənilənə qədər mağaza müdiri yeniyetməni marketdə saxlayıb. Əlavə olaraq məktəblinin 11-ci sinifdə oxuyan qardaşının şəxsiyyət vəsiqəsini və telefonunu da girov götürüb.

Məsələyə adıçəkilən marketin açıqlaması belə olub:

“Təəssüf ki, son hadisədə adı açıqlanmayan yetkinlik yaşına çatmamış müştəri kassadan keçmədən fərqli tarixlərdə müxtəlif çeşidli məhsulları gündəlik ehtiyacdan artıq miqdarda oğurlayıb. İlk olaraq müştərinin böyük qardaşı gəlib və valideyn gələnə qədər onunla birlikdə mağazada gözləyiblər. Valideyn mağazaya yaxınlaşdıqda videogörüntüləri izləyib.

Əməkdaşımız hüquq-mühafizə orqanlarına müraciət edəcəyini bildirəndə xanım ailə vəziyyətini açıqlayaraq övladının yetkinlik yaşına çatmadığını nəzərə alaraq məsələni qarşılıqlı razılaşma ilə həll etməyi xahiş edib. Valideyn kifayət qədər vəsaiti olmadığını əsas gətirərək könüllü şəkildə şəxsiyyət vəsiqəsini və mobil telefonunu girov qoyub, dəyən zərərin yalnız 150 AZN-lik hissəsini ödəməyi təklif edib”.

Mağaza müdiri ananın polisə müraciət etməməsinin səbəbini belə izah edib:

“Düşündüm ki, uşaq qorxub qaçar və özünə hər hansı zərər yetirə bilər. Bu səbəbdən uşağın böyük qardaşı ilə birgə ananın gəlməsini gözlədik. Təəssüf ki, mən bu hadisədə özümü yox, qarşı tərəfi daha çox düşünərək haqlı ikən haqsız vəziyyətə düşdüm. Bu hadisədə kiminsə girov götürülməsindən qətiyyən söhbət gedə bilməz”.

Məsələ ilə bağlı Daxili İşlər Nazirliyindən bildirilib ki, yayılan iddialarla bağlı müvafiq araşdırma aparılır.