Həyətdə 1 kişi, 1 qadın meyiti var idi... | Coratda qandonduran hadisənin təfərrüatı

Coratda evə silahlı basqın edərək 3 nəfəri öldürüb, 3 nəfəri yaralamaqda şübhəli bilinən Müşfiq Tağıyevin cinayət işi üzrə məhkəmə prosesi davam etdirilib.

Sumqayıt Ağır Cinayətlər Məhkəməsində hakim Hafiz Əliyevin sədrliyi ilə keçirilən prosesdə şahidlər ifadə veriblər. Fövqəladə Hallar Nazirliyinin iki əməkdaşı hadisə şahidi kimi ifadə veriblər.

Bildiriblər ki, hadisə baş verən ünvanda yanğın olduğu üçün onlar da orada olublar.

İçəri daxil olanda ilk olaraq yaralı kişini, daha sonra həyətdə bir qadın və bir kişi meyitini gördüklərini bildiriblər.

Təqsirləndirilən şəxsin qardaşı Xəqani Tağıyev ifadəsində bildirib ki, qardaşı ilə eyni evdə yaşasa da, onun işlərinə qarışmayıb. Qarşı tərəflə də heç bir ədavətləri olmayıb.

Onun sözlərinə görə, bu işin əsasında Anar Fərəclinin qardaşına qarşı əxlaqsızlıq etməsi olub.

Qeyd edək ki, 2024-cü il oktyabrın 28-də Sumqayıt şəhərinin Corat bağları yaşayış massivində yerləşən fərdi yaşayış evlərindən birində odlu silahdan açılan atəş nəticəsində iki nəfər – Susana Karakaş və Dağbəyi Fərəcov ölüb.

Hadisə zamanı Tərlan Fərəcova, Serkan Karakaş, daha sonra isə qonşular – Etibar Sarıyev və Mehman Sarıyev xəsarət alıblar. Sonradan yaralılardan biri – Türkiyə xəstəxanasına köçürülən Serkan Karakaş da orada vəfat edib.

Polis əməkdaşları tərəfindən keçirilən tədbirlərlə hadisəni törətməkdə şübhəli bilinən Corat qəsəbə sakini, 1987-ci il təvəllüdlü Tağıyev Müşfiq Məhəmməd oğlu saxlanılıb.

İstintaqla onun qonşusu Anar Fərəcovdan qisas almaq məqsədilə sonuncunun ailəsinin yaşadığı həyətə gələrək evin divarlarına benzin töküb yandırması və özünün hazırladığı partlayıcı qurğunu partlatdıqdan sonra odlu silahdan atəş açaraq evdən çıxan Dağbəyi Fərəcov, Susana Karakaş və Serkan Karakaşı qəsdən öldürməsi, sonuncuların evdə aşkar surətdə köməksiz vəziyyətdə olan 2 azyaşlı övladını, eləcə də Tərlan Fərəcovanı və köməyə gələn qonşuları Etibar Sarıyev və Mehman Sarıyevi qəsdən öldürməyə cəhd etməsinə əsaslı şübhələr müəyyən edilib. Məhkəmənin qərarı ilə Müşfiq Tağıyev barəsində həbs qətimkan tədbiri seçilib.

Məhkəmənin növbəti tarixi 19 fevrala təyin edilib.