İranlıdan aldığı marixuananı satmaq istəyərkən tutuldu

İran vətəndaşı vasitəsilə əldə etdiyi narkotiki satmaq istəyən azərbaycanlı saxlanılıb.

Bu barədə Daxili İşlər Nazirliyi məlumat yayıb. Qeyd edilib ki, daxil olan əməliyyat məlumatı əsasında Səngəçalda həyata keçirilən tədbir nəticəsində narkotik vasitələrin satışı və qanunsuz dövriyyəsi ilə məşğul olan Lənkəran sakini 31 yaşlı Fəxrəddin Bağırlı saxlanılıb.

Həmin şəxsdən və idarə etdiyi avtomobildən 6 kiloqrama yaxın qurudulmuş marixuana və 700 ədəd psixotrop tərkibli metadon həbi aşkarlanıb. Saxlanılan şəxs narkotikləri şəxsiyyəti istintaqla araşdırılan İran vətəndaşı vasitəsilə Qaradağ rayonu ərazisində gizlədilən yerdən ayrı-ayrı şəxslərə çatdırıb pul qazanmaq məqsədilə əldə etdiyini bildirib.

Faktla bağlı cinayət işi başlanılıb. Bu şəxsin daxil olduğu narkoşəbəkənin digər üzvlərinin saxlanılması istiqamətində tədbirlər davam etdirilir.