Məhkəmə İrana casusluq edən azərbaycanlı ilə bağlı qərar verdi

Dövlətə xəyanət edən İran casus şəbəkəsinin üzvünə 18 il həbs cəzası verilib.

Lənkəran Ağır Cinayətlər Məhkəməsində dövlətə xəyanətdə ittiham olunan Bəxtiyar Ağazadənin cinayət işi üzrə məhkəmə istintaqı yekunlaşıb. Hakim İslam Neymanovun sədrliyi ilə keçirilən prosesdə hökm oxunub.

Məhkəmənin hökmü ilə Bəxtiyar Ağazadə 18 il müddətinə azadlıqdan məhrum edilib. Təqsirləndirilən şəxs cəzasını ciddi rejimli cəzaçəkmə müəssisəsində çəkəcək.

İttihama görə, Azərbaycan vətəndaşı Bəxtiyar Ağazadə dini təhsil almaq üçün İranda olarkən həmin ölkənin xüsusi xidmət orqanının nümayəndələri ilə maddi maraq müqabilində məxfi əməkdaşlığa cəlb edilib, onların tapşırığı ilə xarici dövlətlərin Azərbaycanda fəaliyyət göstərən nümayəndəlikləri, ölkədə baş verən ictimai-siyasi proseslər, hərbi hissələr, onların yerləşdiyi yerlər və təyinatları, o cümlədən komanda heyəti barədə əldə etdiyi məlumatları İran xüsusi xidmət orqanına verməklə dövlətə xəyanət etməsinə dair əsaslı şübhələr yaranıb. Onun barəsində Cinayət Məcəlləsinin dövlətə xəyanət maddəsi ilə ittiham irəli sürülərək həbs edilib.