Minik avtomobili ilə yük maşını toqquşub

Abşeronda bir ailənin olduğu minik avtomobili yük maşını ilə toqquşub. Ağır yol-nəqliyyat hadisəsi Saray-Novxanı yolu istiqamətində baş verib.

Belə ki, bir ailənin olduğu “Mercedes” markalı minik avtomobilinin sürücüsü 33 yaşlı İsmayıl Hüseynov idarəetməni itirirək qarşı tərəfdən gələn yük maşını ilə toqquşub. Hadisə zamanı minik avtomobilində olan 6 yaşlı Zəminə Hüseynli, 40 yaşlı Məryəm Allahverdiyeva və Afət adlı qadın aldığı xəsarətlərdən elə yerindəcə vəfat ediblər.

Avtomobildə olan digər 4 nəfər – 5 yaşlı Mehdi Hüseynli, 30 yaşlı Nurəngiz Hüseynova, 60 yaşlı Nahidə Namazova və 33 yaşlı İsmayıl Hüseynov ağır bədən xəsarətləri ilə Sumqayıt Şəhər Təcili Tibbi Yardım Xəstəxanasına çatdırılıblar. Vəziyyətləri ağır olduğundan onlar daha sonra Sumqayıt Şəhər Hospitalına göndərilərək reanimasiya şöbəsinə yerləşdiriliblər.

Məlumata görə, dünyasını dəyişən M.Allahverdiyeva Rusiyada təhsil alırmış. O, Azərbaycana sənəd düzəltmək üçün gəlibmiş. Faktla bağlı araşdırma aparılır