Ödəmə terminalını yardı, əyləncəyə xərclədi

Şirvan Şəhər Polis Şöbəsinin əməkdaşları ödəmə terminalından oğurluq etməkdə şübhəli bilinən şəhər sakini, əvvəllər məhkum olunmuş Coşqun İsmayılovu həbs edib.

Məlum olub ki, adıçəkilən şəxs şəhər ərazisindəki mağazalardan birində quraşdırılmış ödəmə terminalının kassa hissəsini kəsərək onun içərisindən 5694 manat pulu aparıb. Bundan başqa, o, həmin mağazadakı təhlükəsizlik kameralarının yaddaş qurğusunu da götürüb. Saxlanılan şəxs öz ifadəsində oğurluq əməlini əvvəlcədən planlaşdırdığını etiraf edib.

Oğurladığı pulları paytaxtda yerləşən hotellərin birində öz əyləncəsi üçün xərcləyən Çoşqun elə həmin hoteldə də polis tərəfindən saxlanılıb. Onun üzərinə baxış zamanı pulların bir qismi aşkar olunaraq götürülüb.

Hazırda faktla bağlı Şirvan ŞPŞ-nin İstintaq Bölməsində cinayət işi başlanılıb, araşdırmalar davam etdirilir.