Ölkə ərazisində ağır yol qəzaları | Ehtiyatsızlıq can aldı

Oktyabrın 26-da ölkə ərazisində ağır yol qəzaları baş verib.

Abşeron rayonunun Saray qəsəbəsində “Chevrolet Cruze” markalı minik avtomobili yolu keçmək istəyən yeniyetmələri vurub. Hadisə nəticəsində onlardan biri aldığı xəsarətlərdən xəstəxanada ölüb, digəri isə ağır vəziyyətdə Sumqayıt Şəhər Xəstəxanasına çatdırılıb.

Zərdabda da ölümlə nəticələnən yol-nəqliyyat hadisəsi qeydə alınıb. Hadisə Ağcabədi–Zərdab avtomobil yolunda baş verib. Hərəkətdə olan iki minik avtomobilinin toqquşması nəticəsində bir nəfər həyatını itirib.

Ağdaşda səhər saatlarında baş verən qəza zamanı iki nəfər ölüb. Hadisə Bakı-Qazax avtomobil yolunun Ağdaş rayonu ərazisindən keçən hissəsində qeydə alınıb. Belə ki, “Kamaz” və “Qazel” markalı yük avtomobillərinin toqquşması nəticəsində “Qazel”in sürücüsü, 30 yaşlı Eldar Tağıyev və sərnişini, 38 yaşlı Rauf Hacıyev aldıqları xəsarətlərdən hadisə yerində ölüblər.

Qeyd edək ki, “Qazel” markalı avtomobil balıq daşıdığından qəza zamanı balıqlar yola dağılıb və avtomobillərin hərəkətinə çətinlik yaradıb.

Ələt-Astara yolunda baş verən qəzada isə beş nəfər xəsarət alıb. Hadisə Ələt-Astara avtomobil yolunun Salyan rayonu ərazisindən keçən hissəsində baş verib. Qəza nəticəsində bir qadın və dörd kişi müxtəlif dərəcəli bədən xəsarətləri alıb. Yaralılar Salyan Rayon Mərkəzi Xəstəxanasının Təcili tibbi yardım şöbəsinə çatdırılaraq hospitalizasiya olunublar.

Xəstəxanadan verilən məlumata görə, yaralılara zəruri tibbi xidmətlər göstərilib, hazırda müalicələri davam etdirilir.

Hadisələrin başvermə səbəbləri araşdırılır.