"İzini itirmək üçün telefonu da..." | Otaq yoldaşını öldürdü, sonra da meyiti doğradı

Paytaxtın Nəsimi rayonu, Rasim Səfərov küçəsindəki fərdi evlərdən birində qətl hadisəsi baş verib.

Məlumata görə, həmin evdə kirayədə yaşayan 48 yaşlı Fazil Feyzullayev aralarında yaranan mübahisə zamanı 34 yaşlı İsgəndər Əliyevi küt alətlə qətlə yetirib. Daha sonra Fazil Feyzullayev meyiti hissələrə ayıraraq şəxsi avtomobili ilə Ağsu şəhərinə aparıb və orada dağlıq əraziyə atıb.

“Onlar burada çoxdan qalırdılar. Bir gün eşitdik ki, aralarında mübahisə baş verib, gecə otaq yoldaşını doğrayıb”, ‒ qonşulardan biri söyləyib.

Hadisə ilə bağlı Baş Prokurorluqdan bildirilib ki, faktla bağlı Nəsimi Rayon Prokurorluğunda Cinayət Məcəlləsinin 120.2.1 (bir qrup şəxs tərəfindən adam öldürmə), 120.2.5 (tamah məqsədilə adam öldürmə), 120.2.9 (təqsirkar şəxs üçün aşkar surətdə köməksiz vəziyyətdə olan adamı öldürmə) və 245-ci (meyit üzərində təhqiredici hərəkət) maddələri ilə cinayət işi istintaq olunur:

“Toplanmış sübutlar əsasında Fazil Feyzullayev və Ülvi Abasov təqsirləndirilən şəxs qismində cəlb olunub, istintaq orqanının vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında məhkəmənin qərarı ilə həbs qətimkan tədbiri seçilib”.