"Zəng etdilər ki, uşaqlarınız..." | Şagirdlər məktəbdə dəhşətli hadisə ilə üzləşdi - Baku TV

Göygöldə məktəblilər arasında kütləvi zəhərlənmə faktı qeydə alınıb.

Hadisə fevralın 16-da Göygöl rayonunun Aşıqlı kənd tam orta məktəbində baş verib. Məktəbdə təhsil alan şagirdlərdən 10 nəfərin halı pisləşdiyi üçün xəstəxanaya çatdırılıb.

Valideynlərdən birinin sözlərinə görə, uşaqların qarğıdalı çubuqlarından zəhərləndiyi ehtimal olunur:

“Məktəbin bufetində işləyən qadın məhsulları Gəncədən alıb. Yəqin ki, onu aldadaraq vaxtı keçmiş məhsul satıblar”.

Göygöl Rayon Mərkəzi Xəstəxanasından bildirilib ki, 16 fevral 2026-cı il tarixində günorta saatlarında 10 nəfər yeniyetmə qida zəhərlənməsi əlamətləri ilə təcili tibbi yardım şöbəsinə müraciət edib:

“Yeniyetmələr ürəkbulanma, qusma, ümumi zəiflik, başağrısı və qarın nahiyəsində ağrılardan şikayət ediblər. Onlara müvafiq tibbi müayinə və yardım göstərilib. Vəziyyətləri qənaətbəxş qiymətləndirildiyi üçün ambulator müalicə məqsədilə evə buraxılıblar. Həmçinin onlardan götürülmüş bioloji materiallar bakterioloji müayinə üçün aidiyyəti tibb müəssisəsinə göndərilib. Müayinə nəticələrindən sonra qida toksikoinfeksiyasının olub-olmaması dəqiqləşdiriləcək”.