Qusarda qadına qarşı insident | Məhkəmə təqsirləndirilənə nə cəza verdi? - Baku TV

Qusarda gecə evə basqın edərək qadını öpən kişiyə elektron qolbaq taxılıb.

Rayonun Aşağı Ləgər kənd sakini, şərti adı Oruc Qasımov olan şəxsin işinə Qusar Rayon Məhkəməsində baxılıb.

İttihama görə, 35 yaşlı Oruc Qasımov saat 23 radələrində qonşusunun hasarından aşıb və evə qanunsuz daxil olub. Daha sonra o, ev sahibəsini yatılı vəziyyətdə görərək ona yaxınlaşıb. Əvvəlcə alnından öpüb, sonra isə çiyinlərindən tutaraq oyatmaq istəyib. Qadın oyanıb və onu süpürgə ilə evdən qovub.

Faktla bağlı Cinayət Məcəlləsinin mənzildə yaşayanın iradəsi ziddinə evə daxilolma maddəsi ilə cinayət işi açılıb.

Təqsirləndirilən Oruc Qasımov ifadəsində bildirib ki, hadisə zamanı sərxoş olub. Onun sözlərinə görə, gecə saatlarında yük daşımağa kömək etmək üçün həmin evə girib, daha sonra öz evinə gedərək həyətdə yatıb.

Dediyinə görə, bir az sonra polis əməkdaşları gələrək onu saxlayıblar. O, əməlindən peşman olduğunu qeyd edib.

Zərərçəkən qadın isə Orucu kömək üçün çağırmadığını deyib:

"Oruc kömək edib getmişdi. Gecə saatlarında qəfil evimə girdi. Özümü müdafiə etmək üçün süpürgə ilə Orucu vuranda məni buraxdı. Sonra tavanı sifətinə vurdum".

O, Orucla barışmadığını və onu bağışlamadığını bildirib.

Qusa Rayon Məhkəməsinin hökmü ilə Oruc Qasımova elektron qolbaq taxılıb və barəsində 480 saat ictimai iş cəzası verilib.