Sabiq polis qətli sifariş edən dayısını ələ verdi

“Elm və Təfəkkür Universiteti”nin prorektoru Tariyel Əhmədovun öldürülməsində təqsirləndirilən sözügedən universitetin rektoru Müşfiq Atakişiyev, Dəyanət Quliyev və Samir Quliyevin cinayət işi üzrə məhkəmənin növbəti iclası keçirilib.

Bakı Ağır Cinayətlər Məhkəməsində hakim Siyavuş Hacıyevin sədrliyi ilə baş tutan iclasda prokuror Cövdət Mehrəliyev ittiham aktını elan edib.

Toplanmış sübutlara əsasən müəyyənləşib ki, Müşfiq Atakişiyev rektor vəzifəsində qalmasına və işgüzar nüfuzuna maneə kimi qəbul etdiyi zərərçəkmiş Tariyel Əhmədovun qisas məqsədilə pul müqabilində öldürülməsini öz qohumu Dəyanət Quliyevə sifariş verib. O isə 40 min ABŞ dolları müqabilində bu cinayəti həmkəndlisi Samir Quliyevə tapşırıb. Samir Quliyev də öz növbəsində zərərçəkmişi bir neçə gün izlədikdən sonra Bakı şəhəri, Yasamal rayonu Şərifzadə küçəsində yerləşən idman meydançalarından birində küt əşya ilə bir neçə dəfə onun baş və bədəninin müxtəlif nahiyələrinə zərbələr endirərək ölümünə səbəb olan xəsarətlər yetirib.

Müttəhimlər – Dəyanət Quliyev və Samir Quliyev ittihama münasibətdə özlərini təqsirli biliblər. Qətlin sifarişçisi kimi ittiham edilən professor Müşviq Atakişiyev isə verilmiş ittihamla qismən razılaşaraq özünü Cinayət Məcəlləsinin 126-cı (qəsdən sağlamlığa ağır xəsarət yetirmə, ehtiyatsızlıqdan şəxsin ölümünə səbəb olma) maddəsi ilə təqsirli bilib.

Müşfiq Atakişiyev məhkəmədə ifadəsi zamanı deyib ki, mərhum prorektorla əvvəllər yaxın dost olublar, lakin rektor təyin edildikdən sonra Tariyel Əhmədov onu qısqanıb. Bir müddət sonra isə iş o yerə çatıb ki, Tariyel Əhmədov onu həbs etdirib rektor olmaq istəyib. Məhz bundan sonra Müşviq Atakişiyevin cinayət planı ortaya çıxıb.

O, ifadəsində qeyd edib ki, Tariyel Əhmədovun əlaqələrindən ehtiyat edərək həbs olunmaqdan qorxduğundan prorektoru öldürməyi yox, ona xəsarət yetirməyi bacısı oğlu Dəyanətə sifariş edib. İfadələr zamanı məlum olub ki, cinayət əməlinin üstü elə keçmiş polis Dəyanət Quliyev vasitəsilə açılıb. Dəyanət hadisədən 12 il sonra Daxili İşlər Nazirliyinin 102 qaynar xəttinə zəng edərək Tariyel Əhmədovun qətli ilə bağlı məlumat verib.

Məhkəmənin növbəti iclası yanvarın 31-də keçiriləcək.