Şəkidə canavarlar kəndə hücum etdi | Təsərrüfat sahiblərinə ciddi ziyan dəyib - Baku TV

Şəki rayonunun Qozlubulaq kəndində canavarlar təsərrüfatlara hücum edərək sakinlərin xeyli sayda xırdabuynuzlu heyvanını tələf edib. Hadisə nəticəsində kənd sakinlərinə maddi ziyan dəyib.

Zərərçəkənlərdən birinin verdiyi məlumata görə, hadisə səhər saatlarında baş verib. O, heyvanlarına baxmaq üçün tövləyə gedərkən canavarın qapının üstündən tullanaraq qaçdığını görüb:

“Canavar heyvanlarımı məhv edib. 25 baş heyvanımdan 10-u tələf olub, 14-ü yaralanıb. Birini isə canavar özü ilə aparıb. Ümumilikdə mənə 20 min manat ziyan dəyib”.

Kəndin icra nümayəndəsi bildirib ki, canavar hücumu nəticəsində tələf olan qoyunlar baytar həkimlərin müşayiəti ilə kəndin kənarında, təhlükəsiz bir ərazidə xəndək qazılaraq basdırılıb. Zərərçəkənlərin ferma və təsərrüfatı dezinfeksiya olunub.

O da diqqətə çatdırılıb ki, sakinlər istər evi, istərsə də mal-qaranı sığorta etdirməkdə hələ də biganəlik göstərirlər və belə məqamlarda onlara külli miqdarda maddi zərər dəyir.