Uşaq xəstəxanalıq oldu, ana isə dedi ki... | Lənkəranda dəhşətə gətirən hadisə - Baku TV

Lənkəranda 3 yaşlı uşağın fiziki zorakılığa məruz qaldığı bildirilir. Hadisə şəhər ərazisində qeydə alınıb.

Belə ki, 2023-cü il təvəllüdlü azyaşlı müxtəlif dərəcəli bədən xəsarətləri ilə Lənkəran Rayon Mərkəzi Xəstəxanasına hospitalizasiya olunub.

Azyaşlının atalığı tərəfindən döyüldüyü bildirilir. Anası bu haqda danışmaq istəməsə də, uşağın yıxılaraq xəsarət aldığını deyib.

Daxili İşlər Nazirliyinin əməkdaşı Məhəmməd Rzayevin sözlərinə görə, qeyd edilən faktla bağlı hazırda Lənkəran Şəhər Rayon Polis Şöbəsində araşdırma aparılır. Müvafiq ekspertiza təyin edilib. Araşdırmanın nəticəsindən asılı olaraq hüquqi qiymət veriləcək.

Məsələ ilə bağlı Ailə, Qadın və Uşaq Problemləri üzrə Dövlət Komitəsindən bildirilib ki, Lənkəranda 3 yaşlı uşağın zorakılığa məruz qalması ilə bağlı yayılan məlumat ciddi narahatlıq doğurur və uşaqlara qarşı hər hansı zorakılıq qəbuledilməzdir. Uşağın anasının valideynlik hüququnun məhdudlaşdırılması məsələsinə Rayon İcra Hakimiyyəti tərəfindən qanunvericiliyə uyğun olaraq baxılır. Ananın psixoloji vəziyyəti ilə bağlı müvafiq psixoloqlar tərəfindən onunla söhbətlər və psixoloji dəstək tədbirləri həyata keçirilir.

Komitənin açıqlamasında vurğulanıb ki, uşağa qarşı zorakılıq halı və ya belə bir şübhə yarandıqda dərhal aidiyyəti qurumlara məlumat verilməlidir. Uşağın təhlükəsizliyi və üstün mənafeyi hər zaman əsas götürülməlidir.