Xəzərdə itkin düşən balıqçılar barədə ürəkdağlayan xəbər

Astarada dənizdə itkin düşən iki balıqçının axtarışları hazırda genişləndirilmiş şəkildə davam etdirilir.

Hadisə rayonun Şahağac kəndi ərazisində qeydə alınıb.

Kənd sakinləri Ağadədə Həsənov və Turan Həsənov dünən səhər tezdən balıq tutmaq məqsədilə Xəzər dənizinə çıxıblar. Günorta saatlarında onlarla son dəfə telefon əlaqəsi saxlanılıb. Amma hava küləkli olduğundan deyilənlər tam eşidilməyib. Axşam saatlarında evə qayıtmadıqları üçün aidiyyəti qurumlara məlumat verilib.

Axtarışlara Fövqəladə Hallar Nazirliyinin Kiçik Gəmilərə Nəzarət və Sularda Xilasetmə Dövlət Xidməti, Dövlət Sərhəd Xidmətinin sahil mühafizə gəmiləri, eləcə də balıqçıların dörd nəfərdən ibarət yaxın qohumları cəlb olunub.

Hazırkı məqama qədər itkin düşən balıqçılarla bağlı hər hansı məlumat əldə olunmayıb, axtarışlar davam etdirilir.

Qeyd edək ki, A.Həsənov 5 gün əvvəl ata olub, T.Həsənov isə 20 gün əvvəl ailə həyatı qurub.