Yeyib-içdiyi qayınatasına əsəbiləşən kürəkəndən ağlasığmaz addım | SONUNCU ŞAHİD

Kürəkəni onu danlayan qayınatasını qətlə yetirdi.

Kənan (şərti ad) və Əbülfət (şərti ad) qan qohumu idilər. O həm də Əbülfətin kürəkəni idi. Onlar tikililərdən birində işləyirdilər. Kənan fəhlə, Əbülfət isə nəzarətçi kimi çalışırdı.

Günlərin birində Əbülfət kürəkəninə həftəlik maaşını verəndə Kənan pulun həddindən artıq az olduğunu görür, amma susur. Əbülfət ona “hər şey yaxşı olacaq, evə get, qızımı tək qoyma” deyir.

Axşam Kənan əsəbindən rahat otura bilmir. Həyat yoldaşı Nuranə nə olduğunu soruşanda Kənan dözməyib atasının ona verdiyi pulun az olmasından, gördüyü işin müqabilində qazanc əldə etməməsindən şikayətlənir. Nuranə atası ilə danışacağını deyir. Daha sonra isə qadın atasına zəng edərək onu evlərinə çağırır.

Beləliklə, bir neçə saat sonra atası gəlir. Onlar masa arxasına keçib söhbət edirlər. Əbülfət qızını dinlədikdən sonra bütün bu söhbətlərin çox cılız məsələlər olduğunu, tikinti sahəsində işlərin heç də yaxşı getmədiyini deyir. Sözünü bitirdikdən sonra Əbülfət Nuranəyə “nəyə ehtiyacın varsa, mənə de” ifadəsini işlədərək pulu masanın üzərinə qoyur.

Ertəsi gün Kənan tikintiyə gedir və işləməyə başlayır. Qəflətən Əbülfət ona yaxınlaşaraq “sən fəhlə kimi də düzgün işləmirsən” deyir. Kənan isə əsəbiləşməyə başlayır.

Hadisə günü tikintidə iş getsə də, Kənan orada olmur. Əbülfət şəhərdəki kafelərin birinə yollanır. Kürəkəninin kafedə olacağını təxmin edir və onunla rastlaşır.

Qayınatası Kənan ilə söhbət etmək, dərdləşmək qərarını verir. Daha sonra kafedən çıxıb Kənanın evinə yollanırlar.

Onlar həyətə daxil olanda Əbülfət Kənana “atan kimi olma, kişi ol” deyir. Kənan bunu təhqir kimi qəbul edir, əvvəldən planlaşdırdığı kimi cibindən bıçağı çıxararaq Əbülfətə bir neçə zərbə endirir. O, aldığı xəsarətlər nəticəsində həyatını itirir. Kənan isə könüllü surətdə hüquq-mühafizə orqanlarına təslim olur.