Yüksək sürət faciə ilə nəticələndi | Bakı-Quba yolunda ağır qəza

Oktyabrın 6-da 12:45 radələrində Bakı–Quba avtomobil yolunun 136-cı kilometrliyində ağır yol-nəqliyyat hadisəsi baş verib.

Yüksək sürətlə idarə olunan “Mercedes” markalı avtomobilin sürücüsü manevr qaydasını pozaraq idarəetməni itirib. Nəticədə nəqliyyat vasitəsi yoldan çıxaraq ağaclara çırpılıb.

Hadisə nəticəsində avtomobilin sürücüsü hadisə yerində ölüb, sərnişin isə müxtəlif dərəcəli bədən xəsarətləri alıb. Faktla bağlı araşdırma aparılır.

Baş Dövlət Yol Polisi İdarəsi sürücülərə müraciət edərək bildirib ki, sükan arxasında hər bir qərar məsuliyyət tələb edir, manevr qaydalarının pozulması, yüksək sürət və yol şəraitinə uyğun olmayan idarəetmə çox zaman faciəvi nəticələrə gətirib çıxarır.

Sürücülərin bir daha diqqətinə çatdırılır:

- yolda hərəkət edərkən manevr etməzdən əvvəl arxa və yan görünmə güzgülərinə diqqətlə baxsınlar

- qarşıdan gələn nəqliyyat vasitələrinin məsafəsini düzgün qiymətləndirsinlər

- yorğun, halsız və ya diqqəti yayınmış vəziyyətdə sükan arxasına keçməsinlər

- təhlükəsizlik kəmərindən mütləq istifadə etsinlər və avtomobildə olan sərnişinlərin də bu qaydaya əməl etmələrini təmin etsinlər.