Jurnalistlər arasında Atıcılıq turniri keçirilib
Martın 18-i Milli Olimpiya Komitəsinin və Azərbaycan Atıcılıq Federasiyasının təşkilatçılığı ilə media nümayəndələri arasında pnevmatik idman tapançasından 10 metr məsafəyə atəşaçma üzrə yarış keçirilib.
Bakı Atıcılıq Mərkəzində baş tutan və Novruz bayramına həsr olunmuş turnirin açılış mərasimində Milli Olimpiya Komitəsinin vitse-prezidenti Çingiz Hüseynzadə, Azərbaycan Atıcılıq Federasiyasının vitse-prezidenti Zemfira Meftahətdinova, eyni zamanda Olimpiya, dünya və Avropa çempionları da iştirak ediblər.
Mərasimdə çıxış edən MOK-un vitse-prezidenti Çingiz Hüseynzadə hər kəsi Novruz bayramı münasibətilə təbrik edərək yarışın əhəmiyyətindən danışıb. O, bu cür turnirlərin hər il keçirilməli olduğunu vurğulayıb.
Daha sonra Atıcılıq Federasiyasının vitse-prezidenti, Olimpiya çempionu Zemfira Meftahətdinova yarış iştirakçılarına uğurlar arzulayıb.
Çıxışlardan sonra incəsənət nümayəndələrinin iştirakı ilə musiqi nömrələri təqdim olunub. Ardınca KİV nümayəndələri yarış haqda məlumatlandırılıb və turnirə start verilib.
Qeyd edək ki, 30-a yaxın media qurumundan 60-dan çox jurnalistin iştirak etdiyi yarışda ilk 3 yerin qaliblərinə pul mükafatı və diplomlar təqdim edilib. 4-5-ci yerləri tutanlar isə "Fəal iştirakçı" diplomu ilə təltif olunublar.