Lionel Messi yenidən "Barselona"nın futbolçusu olmağa yaxındır

Argentinalı superulduz Lionel Messi yenidən “Barselona”da çıxış etməyə yaxındır.

Belə ki, oyunçunun müqavilə ilə məxsus olduğu “İnter Mayami” MLS liqasının pley-offundan kənarda qaldığı üçün Leonun doğma klubuna müvəqqəti qayıdışı gündəmdədir.

Bildirilir ki, 36 yaşlı forvard da yenidən “Barsa”nın formasını geyinmək istəyir. Bununla belə keçidə kataloniyalıların maliyyə problemləri mane ola bilər. Bu səbəbdən Messinin başqa komandalara da icarəsi nəzərdə tutulur.

Hücumçunu heyətə qatmaq istəyən kollektivlər arasında Səudiyyə Ərəbistanı təmsilçiləri xüsusilə diqqət çəkir. Bu il ərzində Kriştiano Ronaldo, Sadio Mane, Kərim Benzema, Roberto Firmino və digər ulduzları transfer edən Səudiyyə Ərəbistanı klubları Leonun da dəvətində maraqlıdır.

Qeyd edək ki, MLS liqasının məşhur simaları daha əvvəl də yarışda yeni mövsüm başlayanadək Avropanın aparıcı komandalarında top qovublar. Belə ki, ayrı-ayrı vaxtlarda “Los Anceles Qelaksi”nin lideri Devid Bekhem və “Nyu-York Red Bullz”un üzvü Tyeri Anri müvafiq olaraq “Milan” və “Arsenal”da forma geyiniblər.