“Neftçi” Premyer liqanın 29-cu turunda “Sumqayıt”la qarşılaşıb
Futbol üzrə Azərbaycan çempionatında 29-cu tura yekun vurulub. Son oyunda “Neftçi” komandası “Sumqayıt”ı qəbul edib.
“Neftçi Arena”da keçirilən görüşdə hesab 13-cü dəqiqədə açılıb. “Ağ-qaralar”ın üzvü Yuri Matias avtoqol müəllifi olub. Buraxılan topdan sonra meydan sahibləri fəallaşıblar. Ancaq paytaxt təmsilçisinin səyləri fasiləyədək nəticə verməyib.
2-ci yarıda təzyiqi bir qədər də artıran “Neftçi” 73-cü dəqiqədə 11 metrlik cərimə zərbəsi qazanıb. Emin Mahmudovun ilk zərbəsi dəqiq olmasa da, kapitan qayıdan topu qapıya göndərməyi bacarıb.
Qalan vaxtda tərəflərin fərqlənmək imkanları olsa da, hesab dəyişməyib. “Neftçi” – “Sumqayıt”: 1-1. Bu nəticədən sonra xallarının sayını 44-ə çatdıran “ağ-qaralar” 3-cü pillədə qərarlaşıb. 1 xal az toplayan “Sumqayıt” isə 4-cü yerdədir.
Qeyd edək ki, “Neftçi” növbəti turda “Araz-Naxçıvan”ı qəbul edəcək. “Sumqayıt” isə doğma meydanda “Zirə” ilə qarşılaşacaq.