“Neftçi”də növbəti ayrılıq baş tutdu

Bir müddət əvvəl millimizin üzvü Eddi İsrafilovun komandadan getdiyini açıqlayan “Neftçi” daha bir futbolçusu ilə vidalaşıb.

Paytaxt təmsilçisindən verilən rəsmi məlumata əsasən, klub rusiyalı oyunçu Reziuan Mirzovla yollarını ayırıb.

R.Mirzova çıxışına görə təşəkkür edən “ağ-qaralar” ona gələcək karyerasında uğurlar arzulayıb.

Qeyd edək ki, Reziuan Mirzov ötən ilin sentyabrından “Neftçi”nin şərəfini qoruyurdu. Bu müddət ərzində 25 matçda iştirak edən 31 yaşlı vinger 1 qolla yadda qalıb.

Daha əvvəl isə o, karyerası ərzində Rusiyanın “Spartak Nalçik”, “Torpedo Moskva”, “Terek”, “Rostov”, “Tosno”, “Arsenal Tula”, “Spartak Moskva” və “Ximki” klublarında çıxış edib. Təcrübəli oyunçu əsas uğuruna “Tosno”nun heyətində imza atıb. O bu kollektivlə 2018-ci ildə Rusiya Kubokunun qalibi olub.