Qurban Qurbanov Türkiyə nəhənginin diqqət mərkəzində
“Beşiktaş” klubu “Qarabağ”ın baş məşqçisi Qurban Qurbanovla yaxından maraqlanır.
Yerli mediada yayılan məlumata görə, İstanbul təmsilçisinin idman direktoru Samet Aybaba komandanı düşdüyü durumdan ancaq Qurbanovun çıxaracağına inanır.
Belə ki, UEFA Avropa liqasının 1/8 final mərhələsində “Bayer”ə qarşı səfər oyununu tribunadan izləyən Aybaba hesab edir ki, hazırkı baş məşqçi Fernandu Santuşdan sonra bu posta ən layiqli çalışdırıcı Qurban Qurbanovdur.
Həmçinin türkiyəli mütəxəssis “köhlən atlar”ın 2 əsas futbolçusu Olavio Juninyo və Abdullah Zubirin də çıxışını müsbət dəyərləndirib. O, Qurban Qurbanov və oyunçularla bağlı “ağ-qaralar”ın rəhbərliyinə raport təqdim etməyə hazırlaşır.
Qeyd edək ki, “Beşiktaş” kollektivi Superliqada 30 turdan sonra 46 xalla 4-cü pillədə qərarlaşıb. Komanda lider “Qalatasaray”dan 35 xal geri qalır.