“Real” Mbappe üçün neçə milyon ödəyəcək?

“Real Madrid” klubu Kilian Mbappenin transferini tamamlamağa çox yaxındır.

“PSG Community” saytının əldə etdiyi məlumata əsasən, PSJ-nin sahibi Tamim bin Hamad Al Tani və “Real”ın prezidenti Florentino Peres arasında danışıqlar nəticə verib. “Kral klubu” 24 yaşlı futbolçunun transferinə görə Fransa təmsilçisinə 200 milyon avro ödəyəcək. Daha 50 milyon avro isə bonus kimi nəzərdə tutulub.

Bildirilir ki, PSJ-nin keçidə icazə verməsinə əsas səbəb Mbappenin ultimatumudur. Belə ki, Kilian bir müddət əvvəl PSJ-nin prezidenti Nasser Əl-Xelaifiyə məktub göndərərək, gələn ilədək nəzərdə tutulan müqaviləsini uzatmayacağını bildirib. Bundan qəzəblənən rəhbərlik isə Mbappeni transferə çıxarmaq qərarına gəlib.

Qeyd edək ki, 2017-ci ildən PSJ-nin formasını geyinən Kilian 260 matçda 212 qolun müəllifidir. Klub tarixinin ən sərrast oyunçusu olan forvard bu müddət ərzində Fransa çempionatında 5, ölkə kubokunda 3, liqa kuboku və super kubokda isə 2 dəfə qalib gəlib.