BP AÇG-dən hasilatın həcmini açıqlayıb

2025-ci ilin üç rübü ərzində Xəzərin Azərbaycan sektorunda yerləşən "Azəri-Çıraq-Günəşli" (AÇG) yataqlar blokunda gündəlik hasilat orta hesabla 327 min barel və ya ümumilikdə təxminən 89 milyon barel, yəni 12 milyon ton olub.

BP-nin məlumatına görə, üç rüb ərzində AÇG-dən ümumi hasilat – "Çıraq", "Mərkəzi Azəri", "Qərbi Azəri", "Şərqi Azəri", "Dərinsulu Günəşli", "Qərbi Çıraq" və "Mərkəzi-Şərqi Azəri" platformalarından təşkil edib.

2025-ci ilin üç rübündə AÇG-dən hasilatın həcmi ötən ilin müvafiq dövründən 12 min barel və ya ümumilikdə təxminən 4 milyon barel və ya 4,5 % azdır.

Fevralın 18-i AÇG layihəsi "Mərkəzi Azəri" platformasından ilk neftin əldə olunmasının 20 illiyini qeyd edib. İndiyədək bu platformadan ümumilikdə 1,2 milyard barel neft hasil edilib.

Üçüncü rübün sonunda AÇG-də ümumilikdə 145 neft hasilatı quyusu, 48 su injektoru quyusu və 10 qaz injektoru quyusu istismarda olub.

İlin üç rübü ərzində AÇG-də 6 neft hasilat, 4 su injektor və 1 qaz injektor quyusu qazılıb tamamlanıb.