BTC-nin operatorluğu bp-dən SOCAR-a keçib - Baku TV

1 iyul 2026-cı ildən etibarən Bakı-Tbilisi-Ceyhan ixrac neft boru kəmərinin operatorluğu “BP Exploration Limited” şirkətindən “SOCAR Midstream Operations” Məhdud Məsuliyyətli Cəmiyyətinə ötürülüb.

Bu barədə “BP Azərbaycan” şirkəti məlumat yayıb.

Bildirilib ki, operatorluğun ötürülməsi Bakı-Tbilisi-Ceyhan layihəsinin əsasını təşkil edən və yekun investisiya qərarının bir hissəsi kimi qəbul edilmiş müvafiq sazişlərə əsaslanır.

Ötürülmə Səngəçal terminalının ərazisində yerləşən obyektlər istisna olmaqla, Azərbaycan, Gürcüstan və Türkiyədəki bütün ayrıca Bakı-Tbilisi-Ceyhan boru kəmərinə aid obyektləri və digər ümumi fəaliyyətləri əhatə edir.

Səngəçal terminalının operatorluğu dəyişməz qalır. BP obyektin operatorluğunu icra etməkdə davam edəcək.

BTC Co. şirkətinin səhmdarlıq strukturu da dəyişməz qalır.

Qeyd edək ki, uzunluğu 1768 km olan Bakı-Tbilisi-Ceyhan boru kəməri Xəzər regionundan Aralıq dənizinə təhlükəsiz və məsuliyyətli şəkildə xam neft ixrac etmək üçün inşa edilib. Kəmərin cari ötürücülük gücü gündəlik bir milyon barel təşkil edir.