Həmyerlimiz Vahid Ələkbərov sərvətini artırıb

Rusiyanın ən varlı iş adamlarının ümumi sərvəti ilin əvvəlindən 32,01 milyard dollar artıb.

Bu “Bloomberg Billionaires Index”in məlumatlarından aydın olunub.

Qeyd olunub ki, Azərbaycan əsilli milyarder, “Lukoyl”un həmsahibi Vahid Ələkbərov növbəti dəfə ən çox kapital əldə edən iş adamı olub. Belə ki, həmyerlimizin kapitalı 7,25 milyard dollar artaraq 22,6 milyard dollara çatıb. Bununla belə, V.Ələkbərov Rusiyanın ən varlı iş adamları siyahısında dördüncü pillədə qərarlaşıb.

Siyahıda ilk pillədə “Norilsk Nikel” şirkətinin əsas sahiblərindən biri olan Vladimir Potaninin adı gəlir. O, ilin əvvəlindən sərvətini 1,13 milyard dollar artıraraq 29,7 milyard dollara çatdıraraq Rusiyanın ən varlı biznesmeni olaraq qalır.

İkinci yerdə sərvəti 3,49 milyard dollar artaraq 28,1 milyard dollara çatan Leonid Mixelson gəlir.

Üçüncü pillədə ilin əvvəlindən sərvətini 4,36 milyard dollar artıraraq 24,2 milyard dollara çatdıran NLMK-nın benefisiarı Vladimir Lisin, dördüncü yerdə 22,6 milyard dollarla V.Ələkbərov, beşinci yerdə “Severstal”ın əsas benefisiarı, ilin əvvəlindən sərvəti 410 milyon dollar artaraq 19,1 milyard dollara çatan Aleksey Mordaşov qərarlaşıb.