"Mərkəzi Azəri" platformasından indiyədək neçə milyon ton neft hasil edilib? - Baku TV

2005-ci il fevralın 18-də “Mərkəzi Azəri” platforması istismara verilib. Bununla, “Əsrin müqaviləsi” çərçivəsində böyük neft hasilatına başlanılıb.

Ümumilikdə, 1 fevral 2026-cı il tarixinədək Azəri Çıraq Günəşli yataqlar blokundan hasil edilmiş neftin 25,3%-i səmt qazının 39,3%-i məhz “Mərkəzi Azəri” platformasının payına düşür.

“Mərkəzi Azəri” platforması Xəzər dənizindəki nəhəng “Azəri-Çıraq-Dərinsulu Günəşli” yatağının əsas hasilat, qazma və yaşayış obyektlərindən biridir. BP tərəfindən idarə olunan bu platforma, 2005-ci ildən hasilata başlayıb və indiyədək 157 milyon tondan çox neft hasil edərək layihənin uğurunda aparıcı rol oynayıb.

“Mərkəzi Azəri” hasilat, qazma və yaşayış platforması, körpü vasitəsilə ona birləşdirilmiş kompressor və suvurma qurğularının yerləşdiyi texniki platforma ilə birlikdə Xəzər dənizində ən iri dəniz komplekslərindən biri hesab olunur. Bu kompleks “Azəri-Çıraq-Dərinsulu Günəşli” yatağındakı digər platforma və qurğular üçün mühüm əməliyyat mərkəzi funksiyasını yerinə yetirir.

Müasir və qabaqcıl texnoloji imkanları sayəsində yataq üzrə bütün əməliyyatların təhlükəsiz, fasiləsiz və etibarlı icrası təmin olunur.

“Mərkəzi Azəri” beynəlxalq standartlara cavab verən müasir dəniz qurğusudur. Gözlənilir ki, o, qarşıdakı illərdə də Azəri Çıraq Günəşli layihəsinin uğurlu inkişafına mühüm töhfələr verməklə Azərbaycanın neft sənayesində aparıcı mövqeyini qoruyub saxlayacaq.