“SOCAR Türkiyə” və “Pegasus Airlines” ekoloji aviayanacaq üzrə saziş bağlayıb - Baku TV

“SOCAR Türkiyə” və “Pegasus Airlines” ekoloji aviasiya yanacağı sahəsində əməkdaşlığa dair saziş imzalayıblar.

“Trend”in məlumatına görə, saziş Türkiyənin aviasiya sektorunda enerji keçidinin və karbonsuzlaşdırma prosesinin dəstəklənməsinə yönəlib.

Sənəd Türkiyənin ekoloji aviasiya yanacağına olan tələbatının müəyyənləşdirilməsini, bu yanacaq üzrə dəyər zəncirinin inkişafı üçün texniki-iqtisadi araşdırmaların aparılmasını və digər məsələləri nəzərdə tutur.

Tərəfdaşlar həmçinin ekoloji aviasiya yanacağının istehsalı və istifadəsinə hazırlıq səviyyəsini qiymətləndirəcək yüksək səviyyəli rəhbərlərin iştirak etdiyi birgə işçi qrupunun yaradılmasını planlaşdırırlar. Bu təşəbbüsün Türkiyədə dayanıqlı aviasiya ekosisteminin inkişafına və aviasiya sektorunun karbon emissiyalarının azaldılmasına töhfə verəcəyi gözlənilir.

Türkiyənin ən böyük inteqrasiya olunmuş sənaye qrupu olan “SOCAR Türkiyə” ekoloji aviasiya yanacağının istehsalı, tədarük zəncirlərinin inkişafı və texnoloji tərəfdaşlıqlar istiqamətində fəaliyyətini davam etdirir.