ABŞ Dövlət Departamentindən Vaşinqton görüşü ilə bağlı açıqlama

“İnanırıq ki, Azərbaycanla Ermənistan arasında sülh yaxındadır”. Bunu ABŞ Dövlət Departamentinin sözçüsü Metyu Miller deyib.

O, ABŞ-nin birbaşa dialoqu dəstəklədiyini bildirib: “Əlbəttə ki, müzakirə etmək istədiyimiz bir sıra məsələlər var. Biz danışıqların çərşənbə axşamı başlanacağını və bu həftənin cümə axşamına qədər davam edəcəyini gözləyirik. Dövlət katibi Entoni Blinken həm Azərbaycan, həm də Ermənistan xarici işlər nazirləri ilə görüşəcək. Həftə ərzində danışıqlarla bağlı daha ətraflı məlumatımız olacaq. Biz inanırıq ki, sülh əldə edilə bilər və birbaşa dialoq problemlərin həlli və davamlı sülhə nail olmaq üçün açardır”.

Qeyd edək ki, iyunun 27-də Vaşinqtonda Azərbaycan xarici işlər naziri Ceyhun Bayramovla ermənistanlı həmkarı Ararat Mirzoyan arasında görüş keçiriləcək. Müzakirələrin 3 gün davam edəcəyi gözlənilir.