Ağır ittihamlara baxmayaraq, Durov niyə azadlığa buraxıldı? | Detallar açıqlandı

Fransada həbs olunan və sonra Paris məhkəməsi tərəfindən ittiham olunan “Telegram” sosial şəbəkəsinin təsisçisi Pavel Durov azadlığa buraxılıb.

Əvəzində 5 milyon avroluq girov, həftədə iki dəfə polis idarəsinə gəlmək və Fransa ərazisini tərk etməməyi P.Durov öhdəsinə götürüb.

Paris Prokurorluğunun məlumatında deyilirdi ki, P.Durov hakimiyyət orqanları ilə əməkdaşlıqdan imtina, uşaq pornoqrafiyasının yayılmasında şəriklik, narkotik alveri, həmçinin mütəşəkkil dəstənin tərkibində dələduzluqda ittiham olunur.

Bu ittiham siyahısı kifayət qədər ciddidir. Amma necə olur ki, bu cür ağır ittihamlardan sonra P.Durov azadlığa buraxılır?

Politoloq Sahil Kərimlinin sözlərinə görə, bu, Fransanın, xüsusən də Emmanuel Makron hakimiyyətinin çıxılmaz vəziyyətdə olduğunun göstəricisidir:

“Hakimiyyət idarəçiliyinin itirilməsinin, siyasi təfəkkürün, dünyada gedən proseslərin düzgün qiymətləndirilməməsinin nəticəsidir. Hətta Qərbin və Avropanın insan hüquqları təşkilatları da bu məsələyə çox biganə qaldılar”.