Ayrı-seçkilikdən doğan düşmənçilik: Azərbaycana qarşı ikiüzlü yanaşma

İkili standartlar. Bu siyasətin başqa bir adı da var: ayrı-seçkilik. Lakin təəssüf ki, hazırda dünyadakı ikili standartlar və ayrı-seçkilik siyasətləri əndazəni keçərək düşmənçilik strategiyasına çevrilib. Müasir dünyada beynəlxalq düşmənçiliyə ən çox məruz qalan Azərbaycana qarşı bu düşmənçilik ardıcıl olaraq davam etməkdədir.

Azərbaycan 2020-ci ildə ərazi bütövlüyünü bərpa etmək üçün 44 günlük Vətən müharibəsində rəşadətli qələbə qazanıb. Lakin təəssüf ki, torpaqlar işğaldan azad ediləndən sonra UNESCO və BMT-nin digər institutları bu ərazilərə gəlmədilər.

İşğaldan azad olunan ərazilərdə beynəlxalq monitorinqin aparılması ilə bağlı Azərbaycanın mövqeyi dəyişməzdir. Rəsmi Bakı üçün yeganə doğru yanaşma müvəqqəti olaraq yaradılan məhkəmələr və ya tədqiqat istintaq komissiyalarının yerli ofisi ilə işləməkdir. Çünki BMT-nin Bakı ofisi işğala qədər və işğaldan sonrakı prosesləri qurumun digər institutluları ilə müqayisədə daha dərindən bilir.

Bu ofisin geniştərkibli heyəti artıq 2 dəfə bölgəyə səfər edib. Əgər BMT nümayəndələri həqiqətən də ədalət axtarışı ilə bölgəyə gəlmək istəyirlərsə, o zaman bu heyət vəziyyətə birtərəfli deyil, kompleks formada, o cümlədən ümumi kontekstdə 30 illik işğalın səbəb və nəticələrinə, eləcə də məscidlərin və digər abidələrin dağıdılmasına, azərbaycanlılara dəymiş zərərə, bir milyon qaçqın və məcburi köçkünün 30 illik sosial, hüquqi və mənəvi problemlərinə, Ermənistanın Azərbaycan ərazisində yaratdığı genişmiqyaslı mina terroruna, itkin düşmüş şəxslər məsələsinə və Qərbi Azərbaycan mövzusuna geniş şəkildə baxmalıdır.

BMT ədalət missiyası sərgiləmək istəyirsə, Ermənistanda qalan milli irsimizin qorunması, etnoqrafik saxtakarlıqların aradan qaldırılması, erməniləşdirilmiş adların köhnə isimlərinə qaytarılması, qaçqınların geriyə, öz dədə-baba yurd-yuvalarına dönüşü və s. məsələləri həll etmək istədiyinə dair bəyanat verməlidir. Qeyd edək ki, işğal zamanı təcavüzkar Ermənistan BMT-ni hərbi zəbt altında saxladığı Azərbaycan ərazilərinə buraxmamışdı.