Azərbaycan modeli dünyaya yayılır | “ASAN xidmət” Pakistanda fəaliyyətə başlayır

Pakistanda Azərbaycan təcrübəsinə əsaslanan “ASAN xidmət” mərkəzi fəaliyyətə başlayır.

Bununla bağlı 8-10 sentyabr tarixlərində Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyevin rəhbərlik etdiyi nümayəndə heyəti Pakistan hökumətinin dəvəti ilə İslamabadda səfərdə olub.

Səfər çərçivəsində Pakistanın Baş naziri Məhəmməd Şahbaz Şərif “ASAN xidmət” layihəsinin təqdimatında iştirak edib.

O, Prezident İlham Əliyevin təşəbbüsü ilə yaradılmış bu modelin Pakistanda dövlət xidmətlərinin göstərilməsində inqilabi yenilik olacağını bildirib.

Baş nazir əlavə edib ki, layihə hökumətin “nağdsız iqtisadiyyat” siyasətini dəstəkləyəcək, ilkin olaraq İslamabadda tətbiq olunacaq və daha sonra digər şəhər və vilayətlərə genişlənəcək.

Görüşün sonunda Azərbaycan və Pakistan hökumətləri arasında ölkədə “ASAN xidmət” təcrübəsinin tətbiqi üzrə əməkdaşlıq sazişi imzalanıb. Sazişə əsasən, yaxın vaxtlarda İslamabadda ilk “ASAN xidmət” mərkəzinin fəaliyyətə başlaması nəzərdə tutulur.

Səfər çərçivəsində həmçinin “ASAN xidmət” mərkəzinin fəaliyyət göstərməsi nəzərdə tutulan bina infrastrukturlarına da baxış keçirilib.