Azərbaycan Türkiyədən yeni PUA-lar aldı

Azərbaycan Türkiyədən yeni “Akıncı” hücum pilotsuz uçuş aparatları alıb.

Artıq həmin PUA-lar Azərbaycanın Hərbi Hava Qüvvələrinin arsenalına qəbul edilib.

Özünün ən müasir texniki göstəriciləri və döyüş əməliyyatlarında effektivliyi ilə seçilən “Akıncı” PUA-larını Türkiyənin “Baykar” şirkəti istehsal edir. “Akıncı” pilotsuz təyyarələri havada azı 24 saat fasiləsiz qala bilir. 12 min metrdən çox yüksəklikdə uçur və bazadan 150 kilometr uzaqda, tam avtonom rejimdə əməliyyatlar həyata keçirə bilir.

Göyərtəsində üç süni intellektli kompüteri olan “Akıncı” dronları eyni zamanda yerüstü kəşfiyyat aparır, sensorlar və yüksək həssaslığa malik kameralar vasitəsilə məlumatları toplayıb avtonom rejimdə analiz edib komanda mərkəzinə ötürür.

Digər mühüm özəlliyi isə budur ki, həmin pilotsuz sistemlər bütöv eskadrilya halında, avtonom rejimdə döyüşdə tətbiq edilə bilir. Bu zaman dronlar süni intellekt vasitəsilə bir-biri ilə koordinasiyalı hərəkətdə olur.

2021-ci ilin əvvəlinə qədər “Akıncı” PUA-ların sınaqları uğurla tamamlanıb və kütləvi istehsala başlanılıb. Elə həmin il Türkiyə Hərbi Hava Qüvvələri tərəfindən qəbul edilib. 2022-ci ildən isə digər ölkələrə satış üçün istehsalına başlanılıb.