Azərbaycan və Ermənistan sülh yolunda - Baku TV

ABŞ Konqresinin saytında Azərbaycana yardımla bağlı məhdudiyyətin ləğvi barədə qanun layihəsinin mətni yerləşdirilib.

Sənəddə qeyd olunub ki, Azərbaycan Respublikası müstəqillik qazandığı gündən indiyədək ABŞ və onun tərəfdaşları üçün etibarlı müttəfiq olaraq qalıb, müharibə və sülh dövründə mühüm əməkdaşlıq həyata keçirilib.

Həmçinin vurğulanıb ki, Azərbaycan Cənubi Qafqazda sülhün prioritet olduğunu açıq şəkildə nümayiş etdirib və müvafiq sərhədlər, ərazi bütövlüyü Azərbaycan və Ermənistan tərəfindən razılaşdırılan sülh sazişi ilə təsbit olunub.

Qanun layihəsinə əsasən, Azadlığa Dəstək Aktının 907-ci maddəsi ləğv edilib və qanunun mündəricatında həmin maddə ilə əlaqəli bənd çıxarılıb.

Layihəni Nümayəndələr Palatasının Demokratlar Partiyasından Luna Anna Paulina dekabrın 9-da Konqresə təqdim edib.

Qeyd edək ki, Azadlığa Dəstək Aktının 907-ci maddəsi ABŞ tərəfindən Azərbaycana birbaşa dövlət yardımını məhdudlaşdıran qanun müddəası idi. 1992-ci ildə Qarabağ münaqişəsi səbəb göstərilərək qəbul edilən maddə ilə ABŞ-nin Azərbaycan hökumətinə yardımı qadağan edilmiş, siyasi münasibətlərdə baryer yaratmışdı.