Azərbaycanın Almaniyadakı səfiri Paşinyanla erməni dilində danışdı - Baku TV

Azərbaycanın Almaniyadakı səfiri Nəsimi Ağayev Ermənistanın Baş naziri Nikol Paşinyanın Berlinə səfəri çərçivəsində onu erməni dilində salamlayıb.

Bu barədə Ermənistan mətbuatı məlumat yayıb.

N.Paşinyana ermənicə "Almaniyaya xoş gəldiniz" deyən azərbaycanlı səfir daha sonra ingiliscə danışığa keçib.

Səfirin sözlərinə görə, regionda bir neçə il əvvəl təsəvvür edilməsi çətin olan böyük dəyişikliklər olub.

"Bu, münasibətlərimizdə əldə etdiyimiz ən sabit və dinc dövrdür. Biz övladlarımıza və nəvələrimizə bu ağrılı və uzun sürən münaqişəni miras qoymadıq.

Ümid edirəm ki, onlar həmişə sülh şəraitində yaşayacaqlar. Əlbəttə ki, Azərbaycan sülh gündəliyinin təşəbbüskarı olub", – deyə o qeyd edib.

Səfir Vaşinqton razılaşmalarının tam şəkildə yerinə yetiriləcəyinə ümid etdiyini də bildirib. Bu razılaşmaya Azərbaycanın əsas hissəsi və Naxçıvan bölgəsi arasında maneəsiz gediş-gəlişi təmin edəcək "Tramp marşrutu" daxildir.

Diplomat son maneə – Ermənistan konstitusiyasına dəyişiklik edilməsi məsələsinə də diqqət çəkərək bildirib:

"Ümid edirik ki, bu da öz həllini tapacaq və biz sülh müqaviləsini rəsmən imzalaya biləcəyik".