Azərbaycanın beynəlxalq nüfuzu yeni mərhələdə - Baku TV

MDB çərçivəsində 2027-ci ildə sədrlik Özbəkistana keçəcək. Azərbaycan isə təşkilatda Özbəkistanla birlikdə həmsədr olacaq.

2028-ci ildə ölkəmiz MDB-yə tam sədrlik edəcək. Hazırda Türkmənistan, Özbəkistan və Azərbaycan sədrlik troykasını formalaşdırır.

Müstəqilliyini bərpa etdikdən sonra ilk dəfədir ki, Azərbaycan MDB-yə sədrlik edəcək. İndiyədək Ermənistanla Azərbaycan arasında münaqişənin mövcudluğu ölkəmizin bu funksiyanı üzərinə götürməsinə mane olan əsas amillərdən biri idi.

Beləliklə, Azərbaycan Mərkəzi Asiya Dövlət Başçılarının Məşvərət görüşündə, Türk Dövlətləri Təşkilatında, Asiyada Qarşılıqlı Fəaliyyət və Etimad Tədbirləri üzrə Müşavirədə (AQEM) və MDB-də sədrlik funksiyalarını həyata keçirəcək.

Gələn il isə İslam Əməkdaşlıq Təşkilatına sədrlik Azərbaycana keçəcək və təşkilata üzv dövlətlərin Zirvə görüşü ölkəmizdə keçiriləcək. 2028-ci ildə isə Azərbaycan Avropa Siyasi Birliyinin Zirvə görüşünə ev sahibliyi edəcək.